Rohit Sharma
ಭಾರತ ಕ್ರಿಕೆಟ್ ತಂಡ ನಿನ್ನೆ ನಡೆದ ಐಸಿಸಿ ಟಿ20 ವಿಶ್ವಕಪ್ ಫೈನಲ್ನಲ್ಲಿ ದಕ್ಷಿಣ ಆಫ್ರಿಕಾ ತಂಡವನ್ನು ಸೋಲಿಸಿ ಚಾಂಪಿಯನ್ ಆಗಿದೆ. 17 ವರ್ಷದ ಬಳಿಕ ಟ20 ವಿಶ್ವ ಚಾಂಪಿಯನ್ ಎನಿಸಿಕೊಂಡಿದೆ. ಈ ಹಿಂದೆ ಭಾರತ ಟಿ20 ವಿಶ್ವಕಪ್ ಗೆದ್ದಿದ್ದು 2007 ರಲ್ಲಿ ಮಹೇಂದ್ರ ಸಿಂಗ್ ಧೋನಿಯ ನಾಯಕತ್ವದಲ್ಲಿ. 17 ವರ್ಷದ ಬಳಿಕ ರೋಹಿತ್ ಶರ್ಮಾ ನಾಯಕತ್ವದಲ್ಲಿ ಮತ್ತೆ ಟಿ20 ವಿಶ್ವಕಪ್ ಗೆದ್ದಿದೆ. ನಿನ್ನೆಯ ಪಂದ್ಯ ವೆಸ್ಟ್ ಇಂಡೀಸ್ನ ಬಾರ್ಬೆಡೋಸ್ನಲ್ಲಿ ನಡೆಯಿತು. ಭಾರತವು ಪಂದ್ಯ ಗೆದ್ದು ಚಾಂಪಿಯನ್ ಆದ ಬಳಿಕ ಭಾವುಕರಾಗಿದ್ದ ರೋಹಿತ್ ಶರ್ಮಾ, ಪಂದ್ಯ, ಪ್ರಶಸ್ತಿ ವಿತರಣೆ ಬಳಿಕ ಪಂದ್ಯ ನಡೆದ ಕ್ರೀಡಾಂಗಣದ ಪಿಚ್ನ ಮಣ್ಣು ತಿಂದರು!
ಬಾರ್ಬೆಡೋಸ್ ಪಿಚ್ ಮೇಲಿನ ಮಣ್ಣನ್ನು ತಿಂದಿರುವ ಚಿತ್ರವನ್ನು ಸ್ವತಃ ರೋಹಿತ್ ಶರ್ಮಾ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ನೆನಪಿಗಾಗಿ ತಾವು ಹೀಗೆ ಮಾಡಿರುವುದಾಗಿ ರೋಹಿತ್ ಶರ್ಮಾ ಬರೆದುಕೊಂಡಿದ್ದಾರೆ. ಅಲ್ಲದೆ ಬಾರ್ಬೆಡೋಸ್ ಜನರಿಗೆ ಧನ್ಯವಾದ ಹೇಳುವ ಪದ್ಧತಿಯೂ ಇದಾಗಿದೆ ಎನ್ನಲಾಗುತ್ತಿದೆ.
ಭಾರತದಲ್ಲಿ ಮಣ್ಣು ತಿನ್ನುವ ಕ್ರಿಯೆಗೆ ಸಾಂಸ್ಕೃತಿಕ, ಪೌರಾಣಿಕ ನಂಟು ಇದೆ. ಮಣ್ಣು ತಿಂದರೆಂದರೆ ಆ ಮಣ್ಣಿಗೆ ಋಣಿಯಾಗಿರುತ್ತಾರೆ ಎಂಬ ಅರ್ಥವೂ ಇದೆ. ಆ ಮಣ್ಣಿಗೆ ದತ್ತು ಹೋದವರೆಂಬ ಅರ್ಥವೂ ಇದೆ. ವಿಶ್ವಕಪ್ ಗೆದ್ದ ಪಿಚ್ಗೆ ಋಣಿಯಾಗಿರುವುದನ್ನು ರೋಹಿತ್ ಶರ್ಮಾ ಮಣ್ಣು ತಿನ್ನುವ ಮೂಲಕ ತೋರಿಸಿದ್ದಾರೆ ಎನ್ನಲಾಗುತ್ತಿದೆ.
ಇನ್ನು ಕ್ರಿಕೆಟಿಗ ಸೂರ್ಯಕುಮಾರ್ ಯಾದವ್, ಟಿ20 ಟ್ರೋಫಿಯೊಂದಿಗೆ ಭಿನ್ನವಾಗಿ ಫೋಸ್ ಕೊಟ್ಟಿದ್ದಾರೆ. ವಿಶ್ವಕಪ್ ಟ್ರೋಫಿಯನ್ನು ತನ್ನ ಬೆಡ್ರೂಂಗೆ ಒಯ್ದು ತಮ್ಮ ಹಾಗೂ ಪತ್ನಿಯ ನಡುವೆ ಟ್ರೋಫಿಯನ್ನಿಟ್ಟು ಫೋಟೊ ತೆಗೆಸಿಕೊಂಡಿದ್ದಾರೆ. ಪತಿ-ಪತ್ನಿ ಇಬ್ಬರೂ ಬೆಡ್ನಲ್ಲಿ ಮಲಗಿದ್ದಾಗ ಮಧ್ಯದಲ್ಲಿ ಟ್ರೋಫಿ ಸಹ ಇದೆ. ಈ ಚಿತ್ರ ಸಹ ವೈರಲ್ ಆಗುತ್ತಿದೆ.
